Форумот на словенските култури во соработка со своите партнери го подготви Фестивалот на словенската книжевност. Првото издание на фестивалот, кое во наредните години ќе стане редовна книжевна манифестација на културниот календар, беше посветено на 15-годишнината од објавувањето на збирката Сто словенски романи, која се одржа под почесно покровителство на претседателот на Република Словенија, Борут Пахор.
Главни гости на фестивалот беа писателите чии дела се вклучени во националните листи на споменатата збирка: црногорскиот писател Драган Радуловиќ, Александар Гаталица од Србија, хрватската авторка Олга Савичевиќ Иванчевиќ, како и нивните словенечки колеги Сузана Тратник, Јани Вирк и Владо Жабот. Авторите разговараа за својата книжевност, искуствата како писатели и нивните книги од збирката Сто словенски романи за време на трите разговорни вечери одржани во вилата Златица на Хрибар, седиштето на ФСК, која исто така моментално се развива како ново љубљанско книжевно место.
На фестивалот беше прикажан словачкиот филм Камп на паднатите жени, во режија на Лак Халама, базиран на истоимениот роман на Антон Балаж. Минатата година романот беше објавен во словенечкиот превод на збирката Сто словенски романи, за филмот и за книгата зборуваа пак, преведувачката на книгата Дијана Пунгершич и лекторката за словачки јазик Хана Лацова.
Фестивалскиот настан се пресели од главниот град во Целје, каде Драган Радуловиќ во тамошната Централна библиотека разговараше со Зоран Певец, потпретседателот на Друштвото на словенечките писатели, а во дискусијата учествуваа и ученици од три гимназии во Целје.
„Кон мисијата на збирката – да ги поврзе авторите на современата словенска литература еден со друг и да ги донесе нивните дела во прегратките на читателите – фестивалот носи и нова димензија: овозможува живо меѓусебно запознавање и непосредна комуникација“, изјави директорката на Форумот на словенските култури и иницијаторката на збирката „Сто словенски романи, Андреја Рихтер на крајот на Фестивалот на словенската книжевност – литературно-музичката манифестација која се одржа во Мини театарот во Љубљана. Познатиот реторик, писателот Владо Жабот, кој беше и еден од основачите на збирката, изјави: „Со оваа збирка, се отвори заеднички словенски простор за размена на ставови, искуства, социјализација, самопрепознавање, морална слика за себе, идентитет и различни креативни пристапи, накратко, се создаде уметничка комуникација, која во европската традиција е темел на негувањето на хуманоста. Токму на култивираната човечност е можно да се осмислат и воспостават вистински сојузи и реципроцитет“.
На настанот учествуваа главните писатели кои беа гости на фестивалот, а извадоците од нивните дела ги читаа актерите Ника Корењак, Тадеј Пишек и Тимотеј Новаковиќ, додека пак за музиката се погрижи групата Гугутки која свири народна музика од Словенија и Југоисточна Европа.
