Најновиот роман на истакнатиот македонски писател Влада Урошевиќ Дива лига е книга која е напишана на актуелна и интригантна тема – кражба на археолошкото културно богатство. Нејзиното пренесување во македонски амбиент е наполно оправдано со оглед на тоа што,особено последнава деценија, таа е постојано присутна во медиумите за информирање. Урошевиќ наполно суверено ја води приказната која наликува на крими-роман, во амбиент што добро го познава (Скопје, Охрид, Париз), и е прикрепена со многубројни и разновидни податоци од историјата и археологијата кои приказната ја прават сосема уверлива, живописна и “автентична#. Балканот и Македонија како негов централен дел, претставуваат магичен простор во кој се допирале и се среќавале повеќе цивилизации, Истокот и Западот, Северот и Југот, а во својата почва чуваат скриено богатство од најдалечни времиња, чии знаци чуваат во себе необична и таинствена моќ.
