Последниве десетина години Оливера Николова, во вистински налет, создаде повеќе забележани прозни остварувања, меѓу кои романот Вежби за Ибн Пајко зазема особено место. Тоа е книга што уверува дека човекот е загадочно, таинствено и возбудливо суштество кое длабоко во себе сокрива копнежи, радости и таги, и тие се апсолутна константа без разлика на надворешните околности, припадноста на традиции, нации или религии. Сепак, надворешните околности сурово и драматично се замешуваат и ги испреметкуваат душите на луѓето, фрлајќи ги од ведрина во очај, од радост во целосен песимизам. Инаку, Николова успеала да создаде роман исполнет со аромата на древните времиња, преполн со магијата на таинственото и непознатото во кое, како што рековме, сепак се открива големото и трагично човечко срце. Ова е и роман за судирот но и за комплеметарноста на различното.
