Во меѓународната фондација Форум на словенските култури се потпиша договор за соработка со театарот Александрински од Санкт Петербург. Во истиот беа наведени заеднички активности до 2023 година.
„Многу сме почестени што на партнерите на Форумот на словенските култури (ФСК) им се придружува и познатиот Национален драмски театар на Русија. Целта на соработката е да се промовира развојот, зачувувањето и ширењето на театарската уметност, заштитата на историското и културното наследство, зајакнувањето на меѓународните културни врски и популаризацијата на словенските култури на светската арена“, изјави директорката др. Андреја Рихтер при потпишувањето на договорот за соработка во вилата Златица на Хрибар во Љубљана каде што ФСК сега го има и своето седиште.
Сергеј Емелјанов, директорот на Александринскиот театар, за време на потпишувањето истакна дека со нетрпение очекува плодна и креативна соработка, проток на уметници и експерти, спроведување заеднички фестивалски програми, едукативни и културни настани на словенското подрачје и пошироко.
Потписниците на меморандумот, ФСК и Александринскиот театар, со акцискиот план наведоа поконкретни активности до 2023 година. ФСК со своите партнери ќе учествува на меѓународниот театарски фестивал организиран од страна на театарот, а уметници и експерти од словенските земји ќе присуствуваат на театарскиот и меѓународниот културен форум во Санкт Петербург, како и на симпозиумите и семинарите организирани од ФСК и нивните партнери. Преку работни посети, тие ќе поттикнуваат размена на добри практики и ќе организираат размена на уметници во словенските земји. Првата планирана активност ќе се реализира оваа година, кон средината на ноември за време на меѓународниот културен форум во Санкт Петербург.
Театарот Александрински, или со неговото целосно име, Националниот драмски театар на Русија, инаку е најстариот руски народен театар. Основан е во руската културна престолнина Санкт Петербург во 1756 година. Од 1832 година, претставите се достапни за посета во зграда што претставува дело на познатиот архитект Карл Роси, а исто така е запишана и на листата на светско културно наследство на УНЕСКО.
Фото: Борис Претнар
